Qibraylik 18 yoshli 2-guruh nogironi Roman Shokola tumandagi “Monomarkaz”da santexnik va chilangar usta kasbini o‘qib, mukammal egalladi. Endilikda u ishlab, oilasiga nafi tegishi uchun Fond tomonidan zarur asbob-uskunalar sotib olinib, xayriya sifatida taqdim qilindi.

Roman yosh bo‘lishiga qaramay, kelajakka bo‘lgan qiziqishlari katta. Afsuski, u hozir na eshitadi, na gapira oladi. Shunday bo‘lsada umidini so‘ndirmay, o‘z ustida tinimsiz ishlaydi, odamlarga foydasi tegishini xohlaydi.

– Bolamning qiziqishlarini e'tiborsiz qoldirmay, uni o‘qitib, yana zarur texnikalar olib berganingiz uchun katta rahmat. Avvalo, Prezidentimizga, qolaversa vazirlikka va Jamoat fondiga ham alohida tashakkur aytaman. Bizning holimizdan xabar olib, o‘g‘limni bir kasb egasi qilishga yordam berganingiz bizni juda minnatdor qildi, – deydi uning onasi quvonchini yashirolmay.

Endilikda Roman uy-joy kommunal boshqarmalarida, servis boshqaruv kompaniyalarida santexnik-chilangar usta sifatida mehnat qilib, qo‘shimcha daromadga ega bo‘ladi. Uning ishlariga omad tilaymiz.

Aksiya Chirchiq shahrida davom etmoqda.